Тываның Аныяктар яамызы студентилер-биле профилактиктиг ужуражылгаларны эрттирип турар
Тываның Аныяктар херектериниң талазы-биле яамызы Тываның күрүне университединиң болгаш ортумак профессионал өөредилге черлериниң студентилер-биле элээн каш профилактиктиг ужуражылгаларны эрттирген.Ведомствонуң төлээлери неделя санында чогуур специалистер-биле кады өөредилге черлеринге болгаш студентилерниң ниити чуртталга бажыңнарынга барып, кадыкшыл, айыыл чок чорук, кижизидилге, багай чаңчылдар дугайында аныяктарның боттары-биле сайгарып чугаалажып турар.
Бо ужуражылгалар специалистерниң чүгле лекциялар болгаш ажыктыг медээлерин дыңнаарындан аңгыда, айтырыгларын салып, бодалдарын үлежип, хостуг байдалга харылзажыр арганы берип турар.
Октябрьда Тудуг техникумунуң сургуулдары кеш-шээр аарыглар диспансериниң эмчизи-биле ужурашкан. Эр-херээжен харылзаа дамчыштыр чыпшынар халдавырлар, оон камгаланырының аргалары, кадыкшылы дээш харыысалга дугайында билип алганнар. Профилактиктиг лекция болгаш чалаттырган артистиң киржилгези-биле хөгжүмнүг кежээ элээн каш техникумнарның суургалдарын ужураштырып, каттыштырган. Кызылдың СПИД төвүнүң специалистери ВИЧ халдавырга удур профилактика талазы-биле лекцияны Тываның күрүне университединиң бешки курузунуң студентилеринге номчаан.
Аныяктар херектериниң сайыдының хүлээлгезин күүседип турар Субудай Оюн Кызылдың техниктиг-экономика колледжизиниң хөй-ниити чуртталга бажыңынга база четкен. Кежээки чем үезинде ол сургуулдар-биле чугаалажып, чидиг айтырыгларны сайгарган. «Херел» спорт залынга база бир ужуражылга болуп эрткен. Субудай Викторович тренерлер киришкен ужуражылгада, аныяктарның кижизидилгезин база өзүп орар салгалдың амыдыралында дагдыныкчыларның ролюн сайгарган.Ноябрьда яамының төлээлери Транспорт техникумунуң студентилери-биле өөредилге чериниң хөй-ниити чуртталга бажыңынга ужурашкан. Чугаа экстремисчи болгаш терроржу үүлгедиглерге удур демисел дугайында болган. Ондактыг бодалдарны канчаар билип алырын, күткүүшкүнге алыспазын, хоойлуга удур үүлгедиглерден ойталаарын оолдар, уругларга тайылбырлаан. Ужуражылга соонда, дириг хөгжүмнүг болгаш гитаралыг солун кежээ сургуулдарны хаара туткан.
Яамының дыңнатканы болза, дараазында ужуражылгаларны ноябрь төнчүзүнче планнаан. Кызылдың СПИД төвүнүң специалистери-биле кады ортумак профессионал өөредилге черлериниң сургуулдарынга кинону көргүзүп, темалыг викториналарны организастаар.
Аныяктар-биле кол айтырыгларны оларның дылынга билдингир чугаалажыры чугула деп яамы санап турар. Ынчангаш профилактиктиг ужуражылгалар чүгле лекциялар-биле кызыгаарлаттынмас ужурлуг. Ыры-хөгжүм, кежээки чем болгаш ажык чугаалар бүзүрелдиң байдалын тургузуп, сургуулдарның айтырыгларын сайгарып, аңаа харыыларны бээр ужурлуг.
ТР-ниң Аныяктар яамызының чуруу
