Школачыларда быжыг турушту база бедик мөзү-шынарны кижизидип турар

Хүндүлүг редакция!Кызыл хоорайның 9 дугаар гимназиязында өөренип турар мен. «Тываның аныяктары» база «Сылдысчыгаш» солуннарның социал четкилерде бөлүктерин таварыштыр школавыста бистиң ачавыс ышкаш башкывыс Хүреш Хуракович Кыргыска кел чыдар Адалар хүнүн уткуштур байыр чедирип тур мен. Ол дыка хөй өөреникчилерни быжыг сагылга-чурумнуг болурунга өөреткен, кадык амыдыралче углап-баштаан. Ёзулуг-ла эр кижизидилгени школада чорудуп турар.

Хүреш Хуракович 9 дугаар гимназияның немелде өөредилгезинде «Шотокан хевирниң каратэ-до» секциязында 2003 чылдан бээр ажылдап турар. Ооң кол сорулгазы – уругларны күш-культура болгаш спортче хаара тудары база өзүп олурар салгалдың бүгү талалыг сайзыралын чедип ап, кадыкшылын быжыглаары, кадык амыдыралды суртаалдаары, элээдилер ортузунга корум-чурум үрээшкинин болдурбазы. Ону башкывыс биске хүннүң тайылбырлап турар.

Башкывыс Хүреш Кыргыс – спортчу болурундан аңгыда, үлегерлиг ада, хөй-ниитижи. Гимназияда Адалар чөвүлелин удуртуп турар. Школада эр башкыларның дагдыныкчызы. Ол – хөй-хөй шаңнал-макталдарның эдилекчизи.

Хүреш Кыргысович!. Адалар хүнүн таварыштыр байыр чедирип тур мен, башкы!
Силерге ам-даа чедиишкиннерни, аас-кежикти, кадыкшылды күзедим.

Каң-Болат АК,
Кызылдың 9 дугаар гимназиязының 6 «г» клазының өөреникчизи.
«Элээди журналист» бөлгүмү
Башкының хууда чуруу