Найыралдың «телекөвүрүү» Кызыл — Мелитополь

Кызыл хоорайның 20 дугаар школазының өөреникчилери болгаш башкылары «Крымның чазы» «телекөвүрүгнү» Мелитополь хоорайның Совет Эвилелиниң Маадыры П.Т. Одинец аттыг Константиновск ортумак школазында өңнүктери-биле эрттирген. Дорт эфирге школачылар Крымның Россия-биле каттышкан төөгүлүг болуушкунун сайгарып чугаалашпышаан, хоорайларының дугайында таныштырып, чогаадыкчы номерлерни күүсеткеннер. Хемчегниң хүндүткелдиг аалчызы тускай шериг операциязының киржикчизи, Россияның Маадыры Найыр Кыргыс болган. «Мелитополь хоорайда коллегаларывыска чылыг-чымчак хүлээп алыышкын дээш четтиргенивисти илерреттивис. Моон-даа соңгаар кады ажылдажылгавыс уламчылап, чаа-чаа төлевилелдер боттанырынга бүзүрээр бис. Хемчег бедик деңнелге эрткен болгаш, эп-найыралда, кады ажылдажылгада кызыгаар чок дээрзин катап база бадыткаан» - деп, Кызылдың 20 дугаар школазының башкылары демдеглээн.