Наадым — 2025

Улусчу байырлал Наадым Тываның малчыннарының салгалдарының байырлалы. Наадым-2025 эртип турар Тос-Булакка бөгүн өглерни тип, байырлап турар малчыннарның хөй кезии хоочун малчыннарның ажы-төлү, өгбелерниң ажыл-ижин салгап алган амгы салгал. Оларның бирээзи — Чаа-Хөл кожууннуң Булуң-Теректен малчын Роман Чаш-оол. Ол салгал дамчаан малчын. Ооң авазы Адыяа Моңгушевна Чатпак — Муңчу малчын. Муң баш малды азырап өстүргени дээш, Тыва Республиканың алдарлыг малчыны атты Адыяа Моңгушевнага тывыскан. Хоочун малчын назы-харының аайы-биле хүндүлүг дыштанылгаже үнүп, мал-маганын ажы-төлүнге дамчыдып бергеш, оларга арга-сүмези-биле дузалажып чоруур. Өг-бүлениң хууда дузалал ажыл-агыйын оглу Роман Сарыг-оолович чедиишкинниг удуртуп турар. 2022 чылда малчынга Тыва Республиканың алдарлыг чылгычызы" хүндүлүг атты аңаа тывыскан. 2025 чылда мал ажылынга чедиишкиннери дээш "Наадым-2025"-тиң ийиги чергениң шаңналы 100 000 рубль акшаны малчынга тывыскан. Шаңнал акшаны дузалал ажыл-агыйын улам хөгжүдеринге Роман Чаш-оол ажыглаар.