Малчыннар-дыр
Найыр-дойлуг, байырланчыг
Наадым хүнү келгени бо.
Малын сүрген амыр, кежээ
Малчыннарны алгап-мактаал.
Кыштың соогу, изиг чайын
Кылыр иштиг, ак сүт чемниг,
Кызымаккай олут орбас
Кымнарыл ол...
Малчыннар-дыр.
Инек, бызаа, чылгы-богба,
Иви, сарлык, өшкү, хойлуг,
«Муңчу» аттыг хүндүткелдиг
Мурнакчылар —
малчыннар-дыр.
Чылды өттүр дыштанмас-даа,
Чымыш ижи дүн-хүн дивес,
Азырааны онча-менди
Ажыл-ишчи малчыннар-дыр.
Өлдүг-шыктыг, чаъстыг харда
Өдек малын ажаап-тежээр,
Тура дүшпес, соруу быжыг,
Тулган эрес малчыннар-дыр!
Аяна Хомушку
Буян Ооржактың чуруу
