Малчын кижи эртеми хөй

Малчын кижи — таңныыл-дыр ол. Коданында кончуг ыттың Хөг-хөг диген ээргизинден Дүүргезин дүрген октааш, Дүг-дөг кылдыр этси кааптар. Малчын кижи — агроном-дур. Чазын шөлүн суггаргаштың, Чашпан, богун арыглааштың, Чеже тонна малдың чемин Четчир кылдыр белеткеп аар. Малчын кижи — ветеринар. Баксыраан мал көстүп келзе, Байгы күжүн салып тургаш, Сынган черни чаткыыштаптар, Сыкыртыпкаш, экиртиптер. Малчын кижи — зоотехник. Уксаазынче кичээңгейни Угландырып, экижиткеш, Төрүлгезин санап тургаш, Төлүн менди камгалап аар. Малчын кижи — парикмахер. Март, апрель, май айларда Малын имнеп, чазап, челдээш, Өшкү, хоюн кыргып, тааргаш, Өртек чедир сайгарып аар. Малчын кижи — психолог. Малы төлүн хоза берзе, Майт-шорт кынып эттей бербес. Доотпалап, чучууналап, хөөглеп тургаш, Доозазын чаажыктырып алзып алыр. Малчын кижи — артист-тир ол. Маргышпаалгар, шынын сөглээйн, Баалык, сыннар бажын кырлай, Кадарчының хоюг үнү, Каргыраазы чаңгыланыр. Малчын кижи — спортчу-дур. Кончуг соокта, изигде-даа Кожагарлар сиртин тевер. Хоюн доскаш, инээн ай дээш, Хокпаңнадыр шошкуп чоруур. Малчын кижи — тудугжу-дур. Малчын кижи — тудугжу деп, Мактай бээр мен, бүзүреп көр. Бажың, кажаа, сери, өөн-даа, Банязын-даа боду тудар. Малчын кижи — няня-дыр ол. Маа-маа дишкен хураганның, Ме-кээ диген анайларның, М-бөө диген бызааларның, Мамазы, нянязы-дыр. Малчын кижи — егерь-дир ол. Кодан чоогу бойдус-байлаан Кончуг камныг хумагалаар. Кокай болгаш төтчеглекчи Когу үстүп чорзун-на дээр. Малчын кижи — гинеколог. Төрүп чыткан малдың төлүн, Дузалажып, чиигедип ап, Шаразын са чылгадыпкаш, Чаагай аазын эмзирип каар. Малчын кижи — бухгалтер-дир. Коданда бар баш санын Кончуг таптыг чизелээштиң, Четчелээри — малчын кижээ Сеткилинден кылыр ижи. Малчын кижи — бүдүрүкчү. Садыгларда барааннарның Салдынганын сонуургап көр. Дөгерезин малчын күжүр, Дери-биле кылып чоруур. Малчын кижи — сайгарлыкчы. Эьтти, сүттү, кешти, дүктү, Эңмежокту бүдүрүп ап, Эргим чоннуң хереглелин, Эртинезин эккеп садар. Малчын кижи — повар-дыр ол. Манчы, хуужур, арбай-тараа Пашты долдур дүлүп каан эьт, Ааржы, хойтпак, саржаг, чөкпек, Амданныг чем кылып чиирлер. Малчын боду — дарга-дыр ол. Ээзиниң дайгызындан малы амыр, Эглип, чанып сөзүн дыңнап өзүп чоруур. Хүнде кылыр ажыл-ижин аалынга Күжүр дарга шиитпирлиг кылып чоруур. Шүлүктү болгаш чурукту ажык социал четкилерден алган.