Маадырның авазы – башкы

#өөредилге Светлана Кылын-оол – кожуунда болгаш төрээн школазында арга-дуржулгалыг, чогаадыкчы, салым-чаяанныг башкыларның бирээзи. Ол бодунуң ажылын кончуг эки билир. Үре-түңнелдиг ажылы дээш РФ-тиң Чырыдыышкын яамызының «РФ-тиң чырыдыышкын болгаш кижиздилге ажылында алдарлыг ажылдакчы» деп хөрек демдээ-биле шаңнаткан. Оон аңгыда республика чергелиг хөй-хөй шаңнал-макталдарның эдилекчизи. Ол – харыысалгалыг болгаш сагыш човангыр, эш-өөрүнүң, ада-иелериниң аразында хүндүткелдиг башкы. Светлана Очур-ооловна Кылын-оол – Россияның Маадыры Мерген Донгактың авазы. Хүндүткелдиг башкы - 4 ажы-төлдү азырап өстүрген, 5 уйнуктарының база 5 уйнуктарының уругларының ынак кырган-авазы. Светлана Кылын-оол 50 хире чыл дургузунда педагогика адырынга ажылдаан. Бодунуң күш-ажылчы базымнарын Иштии-Хем ортумак школазынга эгелээн. Аныяк-өскенни «чөргектен» кижизидип келген деп дорт чугаалап болур. Ол – аныяк башкыларның дагдыныкчызы. Хүндүткелдиг кырган-ава уруг-дарыын хүндүткелге, шынчы чорукка кижизидип чоруур. Тыванын аныяктары/Молодежь Тувы