Ленинградты хостаар тулчуушкунга чаңгыс чер чурттугларывыс киржип турган

Январь 27-де фашистиг бүзээлээшкинден Ленинградты хостаан хүнү. Хайыраканның дазылга бажыңының социал ачы-дуза алыкчылары Ленинградты бүзээлелден хостаанының 83 чылынга тураскааткан «Блокада хлеви» деп ада-чуртчу акцияга каттышкан. Акция шупту кижилерге өлүмнүң айыылынга тургаш-даа дайзыннарга хоорайын дүжүп бербээн ленинградчыларның туруштуг болгаш эрес-дидим, маадырлыг чоруунуң дугайында сагындырып турар. Бүзээлээшкин үезинде мурнакчы отрядтың дайынчыларынга бир хүнде 500 грамм, цех ажылчыннарынга – 375 грамм, арткан ажылчыннарга болгаш инженерлерге – 250 грамм, албан-хаакчыларга, азыралда кижилерге болгаш уругларга – 125 грамм хлеб онаажыр турган. 872 хонук үргүлчүлээн Ленинградка бүзээлээшкин (1941 чылдың сентябрь 8-тен 1944 чылдың январь 27-ге чедир) ХХ чүс чылда Ленинградтың тайбың чурттакчыларын аш-чут-биле узуткаар дээн нацистерниң деңнээр чүүл чок үүлгедии-дир. Төөгүчүлер бүзээлээшкинниң ниити когарааннарының саны бүдүн чартык сая кижи деп санап турар. Хоорайны хостаар тулчуушкунга киришкен чаңгыс чер-чурттугларывыс – Шумов алышкылар, Совет эвилелиниң Маадыры Николай Макаренко. Оларның эрес-дидим, маадырлыг чоруун утпайн, сактып чорууру чугула.