Кызылдың эң тергиин эки турачызын илередир

Кызыл хоорайның аныяктар херээ, спорт болгаш культура департаментизиниң дыңнадып турары-биле алырга, "Кызыл хоорайның эң тергиин эки турачызы - 2022" мөөрейни чарлаан. Мөөрейге 14-тен 35 хар чедир назылыг хамаатылар киржип болур. Олар кайы-бир волонтержу отрядтың азы, коммерцияга хамаарышпас организацияның, кандыг-бир социал, культурлуг, өөредилге угланыышкынныг албан чериниң кежигүнү болур ужурлуг. Оон аңгыда бот-тускайлаң эки турачы ажыл кылып турар ол-ла хире хар-назылыг хамаатылар киржип болур. Мөөрейге киириштирер материалдарын дараазында адреске дужаар: Кочетов кудумчузу, бажың 29, каб. №103. Бир эвес электроннуг хевирге дужаар болза, дараазында адрес езугаар чорудар: depart_kult@mail.ru Ажылдарны 2022 чылдың ноябрь 30-ге чедир хүлээр. Мира КОНГУЛ-ООЛ белеткээн. Чурукту Интернеттен алган.