Кызылчыларның соңгулдалардан эскериглери

Тывада соңгулданың 2 дугаар хүнү эртип турар. Чурттакчы чон бадылаашкынга идепкейлиг киришпишаан, боттарының бодалдарын илереткен. Бо эртен «Тываның аныяктары» солуннуң редактору Кызыл хоорайның 12 дугаар Ленинский соңгулда участогунуң чурттакчылары-биле чугаалашкан. Альберт Дапылдай, соңгукчу: - Соңгулдага киржири, бир дугаарында, мээң хамааты хүлээлгем болур. Башкы кижи болганымда, аныяк-өскенни база төрээн черинге ынак болурун, чуртунуң хөгжүлдезинге үлүг-хуузун киирерин үргүлчү чугаалап турар мен. Сөөлгү чылдарда бадылаашкынны 3 хүнге чарып кааны эптиг-дир. Күскү үе болгаш, улустуң бажың-балгадында кылыр ажылы хөй болгай. Чай чок апарза, өске-даа хүннерде соңгуп болур. Соңгукчулар-даа, комиссияның кежигүннери-даа эвилең-ээлдек, эп-найыралдыг болганы өөрүнчүг болду. Тываның соңгулда участоктарында дүн-хүн чокка офлайн видео-бүрүткел ажылдап турарын сагындыраал. Ону 55 соңгулда участоктарында салган. Оон аңгыда 19 соңгулда участогунга бюллетеньнерни электроннуг хевирге санаар комплекстерни ажыглаар. Мира КОНГУЛ-ООЛ. Тыванын аныяктары/Молодежь Тувы