Кызыл-Мажалыктан Менги Хомушкунуң хууда ажыл-херээ

Барыын-Хемчик кожууннуң Кызыл-Мажалыктан тускай шериг операциязының хоочуну Менги Хомушку социал керээге үндезилээн күрүне деткимчезин алгаш, баш таарар черни ажытканын ТР-ниң Дээди Хуралының депутады Ульяна Монгуш дыңнаткан. Эгелеп чоруур сайгарлыкчы үе-үе болгаш-ла амыдыралы чегей өг-бүлелерни деткип, оларның ажы-төлүн халас хүлээп ап турар. Дөрт оолдуг ада хөй ажы-төлдүг өг-бүле ай санында баш таарарынче кайы хире чарыгдал үндүрүп турарын эки билир. Баш таарар черниң оран-савазы делгем болгаш чырык. Менги Хомушкунуң чугаазы-биле алырга, чоок-кавы суурларның чурттакчылары база кээп турар. Хүнде он ажыг кижини хүлээп четтигиптер. Чамдыкта дүъштээр үе безин чок болур. Дуржулгалыг баш таарыкчызы хууда ажыл-херээн ажыдып алыр дээш, комиссияга бизнес-төлевилелин ажыктыын шынзыдып шыдаан. “Ада-чурттуң камгалакчылары” күрүне фондузунуң салбырының кожуунда социал координатор Надежда Саая, кожууннуң Чонну ажылга хаара тудар төвүнүң удуртукчузу Эдуард Бады тускай шериг операциязының хоочунунга бүгү талалыг дузаны көргүскен. ТуваМедиаГрупп