Кызыл кожуунда спортчу школаның септелгезин чорудуп турар

Кызыл кожуунда «Авырга» спортчу школазының септелгезин чорудуп турар. 1986 чылда туттунган оран-саваның септелгезинче 1,5 млрд федералдыг акша-хөреңгиниң иштинден 4,5 сая рубльди үндүрген. «Кожууннарда чидиг айтырыгларже кичээнгейни углап турары өөрүнчүг-дүр, бистиң школавыста 700 ажыг уруглар кээп турар. Мында баскетбол, хол бөмбүү, хүреш, дзюдо, бут бөмбүү болгаш сумо секциялары ажылдап турар» - деп, спортчу школаның директору Эрес Аңгыр-оол журналистерге чугаалаан. Спортчу школаның шалазын, эжиктерин, соңгаларын чаартып кылып турар. Шалазын бетондан кудуп кылыр. Ооң дээвиирин бүрүнү-биле чаарткан, ам чүгле шифер чадары арткан. Тываның тудуг сайыдының оралакчызы Субудай Оюннуң дыңнатканы-биле алырга, капитал септелгениң бирги чадазы чоруп турар. Эрги шывыгларның шуптузун чаартыр. Кол-ла чүүл – спортчу зал чылыг болуру чугула, ол ышкаш агаарладыышкын хүртүзүн салыр. Бо бүгү ажылдарны школаның тренерлери болгаш Спорт яамызының ажыл-агый эргелелиниң ажылчыннары кылып турар. Ниитизи-биле капитал септелгени октябрь айның ортузунга чедир доозуптар. Оон аңгыда капитал септелгени Бай-Тайганың, Сүт-Хөлдүң, Каа-Хемниң спортчу школаларынга чорудары планнаттынган. Ынаар 20 сая хире рубльди 1,5 млрд федералдыг акша-хөреңгиден үндүргенин сагындыраал. #реальныедела #федеральныеденьги #ремонтспортшкол #молодежь #ЗОЖ #тыванын_аныяктары #сылдысчыгаш