Кышкы үеде өрт айыылындан камгалал
Улуг-Хем районнуң өрт-камгалал кезээниң хуу составы хүн бүрүде профилактиктиг үнүүшкүннерни чорудуп, чон ортузунда тайылбыр ажылдарын чорудуп турарын фоточуруктардан көрүп болур.
Өрт айыылы сезон аайы-биле болуп турарын билир бис. Кышкы үеде өрт айыыл-халавы колдуунда суугуну шын эвес ажыглаанындан болур.
Ынчангаш суугу одаар чуртталга бажыңнары дараазында дүрүмнерни сагыыры чугула:
- бажың иштин чылыдыр одап тургаш, суугуну хайгаарал чокка арттырбазын кызыдыңар, ону бичии уругларга дагзып болбас;
- суугу чоогунга кывар-чаар материалдар салып болбас;
- суугуну эмин эрттир изидир одавас;
- өрт айыылының техниктиг болгаш стандарттыг негелделеринге дүүшпес демир суугуларны салыры хоруглуг.
Кышкы үеде электрилиг чылыдылга херекселдерни шын эвес ажыглаанындан өрт айыыл-халавы тургустунуп болур.
