КПКУ-нуң 10 чыл болган юбилейи

Кызылдың президентиниң кадет училищези тургустунганындан бээр 10 чыл болуп турар. Амгы үеде КПКУ-да 400 ажыг оолдар, уруглар өөренип турар. Тываның Баштыңы Владислав Ховалыг КПКУ-нуң 10 чыл болган юбилейи-биле байырны чедирген. Владислав Ховалыг, Тываның Баштыңы: "Бөгүн Кызылдың президентиниң кадет училищези тургустунганындан бээр 10 чыл болуп турар. Амгы үеде КПКУ-да 400 ажыг оолдар, уруглар өөренип турар. Оларның аразында тускай шериг операциязынга эрес-дидими-биле амы-тынындан чарылган маадырларның уруглары бар. Кадеттерге инженер-техниктиг, лингвистиг болгаш чөөн чүк улустарының спортчу демисел школаларын организастаан. Оолдар, уруглар шериг херээниң арга-мергежилинге өөренип, спорт-биле харылзаалыг болбушаан, бүгү талалыг сайзыралды ап турар. Билиглер хүнүнде чурттуң Президентизи Владимир Путинниң өөредилге черинге келгени КПКУ-нуң юбилейинге улуг болуушкун болган. "Силернии ышкаш өөредилге черлерин көргеш, Россияның келир үезинге бүзүрелим улуг. Уруглар аас-кежиктиг өзүп-доругар болзун" - деп, ол чугаалаан. Бодунуң чедиишкиннери-биле бистиң училищевис бедик статузун бадыткап турар. Өөредилгениң шынары-биле олар Россияның Камгалал яамызының дээди өөредилге черлериниң бетинде өөредилге организацияларының аразында үшкү черни ээлеп турар. Бо кыска үениң дургузунда 80 оолдар, уруглар медальдар-биле дооскан. Байырлал-биле, хүндүлүг кадеттер база башкылар! Байыр чедирип тур мен!" Алена Нан-Хоо. Чуруктарны социал четкилерден алган.