#Команда_Тувы_2030 аныяктар шуулганы болуп турар

Чаңчыл езугаар бо хүүннерде база аныяктарның «Тываның командазы – 2030» шуулганы эртип турар. Ында республиканың болгаш чоок-кавы регионнарның идепкейлиг аныяктары чыылган. Олар боттарының күзелдерин боттандырар сорулгалыг. Оон аңгыда кижи бүрүзү арга-дуржулга ап, грантыларга киржип, социал төлевилелдерин камгалавышаан, кайгамчыктыг бойдус-чурумалдыг «Алдын-Булакка» эш-өөрүнүң аразынга дыштанырлар. Шуулганга республиканың янзы-бүрү булуңнарындан 110 хире аныяк кижи киржир. Оларның аразында хөй-ниитижи аныяктар, аңгы-аңгы хоорайларда землячестволарның төлээлери, аныяк специалистер, аныяктар чөвүлелиниң кежигүннери, аныяк депутаттар, чедиишкинниг сайгарлыкчылар, дээди болгаш ортумак өөредилге черлериниң студентилери болгаш муниципалдыг тургузугларның төлээлери, аныяктар адырында ажылдакчылар бар. «Тываның командазы – 2030» шуулганны ТР-ниң Аныяктар херектериниң талазы-биле яамызы организастап турарын сагындыраал. Аныяктарның регионнар аразының шуулганы үш хонук дургузунда үргүлчүлээр. Шуулганның федералдыг спикерлери: «StudHall» студенчи кофейняның үндезилекчизи, «Аныяк сайгарлыкчылар клувунуң» регионалдыг төлээзи Анастасия Бородина болгаш «Россияның лидерлери 2023» башкарыкчылар мөөрейиниң финализи, федералдыг мөөрейлерниң эксперти Ольга Алемжина. Киржикчилер бизнес-планнарны тургузары, төлевилелди амыдыралга боттандырары дээн ышкаш айтырыгларга харыыны алыр. Тываның Аныяктар талазы-биле яамының дыңнадып турары-биле алырга, ниитизи-биле 40 төлевилелди киржикчилер камгалаар. Аныяктарны солун программа манап турар: янзы-бүрү мастер-класстар, тренингилер, лекциялар, сайгарлыкчылар, эксперттер, хөй-ниитижилер, эрге-хоойлу ажылдакчылары-биле ужуражылгалар дээш оон-даа өске. Мира КОНГУЛ-ООЛ белеткээн. Буян ООРЖАКТЫҢ тырттырган чуруу.