Көдээ ажыл-агый сайыды алдарлыг чылгычының аалынга четкен

Тываның көдээ ажыл-агый болгаш аъш-чем сайыды Юрий Оруспай Өвүр кожуунга ажыл-агыйжы сургакчылап чораанын чагырга чери дыңнаткан. Сайыт биле кожууннуң чагырга даргазының оралакчылары Тываның алдарлыг чылгычызы Буян Самбуунуң аалынга чедип, кыштаглаашкын кайы хире эртип турарын хынап көрген. Юрий Оруспай кыштагның ээзи мал чемин четчир кылдыр белеткеп алганын демдеглээн. Аъттанып алгаш кызыгаар кыдыын база барып көрүп чорааннар. Чагырга чериниң төлээлери, көдээ ишчи сайыт-биле ТР-ниң Чазааның болгаш яамының мурнундан деткимче алыр төлевилелдер, субсидия, дотация, грантылар, көдээ ишчилерге санаторлуг-курорт эмнээшкин дугайында, кызыгаар айтырыы, хорриот программаның күүселдезин, келир үеде салдынган сорулгаларны, кылып турар чаа төлевилелдерни, суггарылга системазын, мал санының бажын көвүдедир, чер айтырыглары дээш оон-даа өске айтырыгларны көдүрүп чугаалашканнар.