Камчаткага Наадым байырлалы эрткен
Камчаткада ажылдап турар студенчи отрядтар ортузунга Наадым байырлалы эрткен. Тываның көдээ ажыл-агый техникумунуң «Мегаладон» студенчи отрядының дайынчылары Камчаткага «Ича-Фиш» заводунга ийи ай дургузунда ажылдаар.
Сургуулдар ында далайның балыын болбаазырадыр ажылда арга-дуржулга ап, команда-биле ажылдаарынга өөренип, чаа эш-өөр-биле таныжып ап турарлар.
Ол ышкаш аныяктар спортчу хемчеглерни эрттирип, боттарының национал чаңчылдарын утпайн турар. Дыштаныр хүннеринде аныяктар Наадым байырлалын организастаан.
Солун оюн-тоглааның түңнелинде, бут бөмбүүнге Тываның көдээ ажыл-агый техникумунуң студенчи отряды тиилээн. Тергиин халдакчы Саян Шактар-оол болган. Хол бөмбүүнге үшкү черни база бистиң команда ээлээн. Канат тырттарынга уруглар командазы ийиги черни ээлээн.
Шак-ла мындыг хемчеглер салгалдар аразында харылзааны быжыктырар, төрээн чериниң культуразын, езу-чаңчылдарын кадагалаарынга дузалыг.
Студенчи отрядтарның медээзинден Мира Конгул-оол белеткээн.
Чуруктарны социал четкилерден алган
