Хем-сугну кайы-хамаанчок кежеринче семээн херээ чок!

Бөгүн Тываның Баштыңының хүлээлгезин күүседип турар Владислав Ховалыгның удуртуп эрттиргени чазактың аппарат хуралы болган. Аңаа бо каш хонуктарда республиканың девискээринге суггур чаъс чагганындан «Бай-Хаак - Чал-Кежик», «Бай-Хак - Балгазын», «Хандагайты - Ак-Чырааның» 71 километрде, Ак-Эрик суурже кирер орук, «Самагалтай - Ак-Чыраа» оруктарында аргыжары бергедээнин Орук-транспорт комплекизиниң сайыды Ш. Чыргал-оол дыңнаткан. Бо оруктарда сагындырыг демдектерин тургускан болгаш ояр оруктарны белеткеп эгелээн. Чиик машина-биле чер чоруп турар хамаатыларга кичээнгейлиг болурун сагындырып турар. Ол ышкаш Тере-Хөл кожууннуң Тарыс аржаанында дыштанып турар чонга Балыктыг-Хемни кежери бергедээн. Бо хүннерде аңаа 40 кижи муңгашталган, оларның аразында 5 назы четпээн уруг бар. Олар хемни сүзүп кежери-биле, сугнуң чавырлырын манап турган. Хүндүлүг чурттакчылар, ада-иелер! Эрткен чылдарда кайы-хамаанчок черлерден машиналыг, чадаг үерлээн хемнерни кежип чыткаш, озал-ондакка таваржып, амы-тынындан чарлып турган чаңгыс чер-чурттугларывысты утпаалыңар! Ынчангаш боттарыңарның болгаш назы четпээн уруг-дарыыңарның кадыкшылын кадагалап, хем-сугну кайы-хамаанчок кежеринче семээн херээ чок! #аппаратхуралы #чазак #үер #орук #хем #тыванын_аныяктары