Хүнде үлеп турган хлебтиң эң-не хензиг үлүү – 125 грамм

Фашистиг бүзээлээшкинден Ленинградты хостаан хүнде Хову-Аксының школазы “Блокада хлеви” деп бүгү-российжи акцияга каттышканын өөредилге чери дыңнаткан. Башкылар өөреникчилерге 125 грамм хлеб кезээн үлээн. Акция шупту кижилерге өлүмнүң айыылынга тургаш-даа дайзыннарга хоорайын дүжүп бербээн ленинградчыларның туруштуг болгаш эрес-дидим, маадырлыг чоруунуң дугайында сагындырып турар. Ленинградтың бүзээлээшкининиң эң-не берге үезинде хүнде үлеп турган хлебтиң эң-не хензиг үлүү – 125 грамм. Ийи чартык чыл – 872 хонук үргүлчүлээн Ленинградка бүзээлээшкин (1941 чылдың сентябрь 8-тен 1944 чылдың январь 27-ге чедир) ХХ чүс чылда Ленинградтың тайбың чурттакчыларын аш-чут-биле узуткаар дээн нацистерниң деңнээр чүүл чок үүлгедии-дир. Хоорайны хостаар тулчуушкунга киришкен чаңгыс чер-чурттугларывыс – Шумов алышкылар, Совет эвилелиниң Маадыры Николай Макаренко. Оларның эрес-дидим, маадырлыг чоруун утпайн, сактып чорууру чугула. #ТМГМедээлер