Эртен Москва хоорайга Баштайгыларның IV съездизи ажылын эгелээр

Движение Первых уругларның болгаш аныяктарның хөй-ниити шимчээшкининиң IV съездизиниң ажылында Тывадан төлээлер киржип турар. Бистиң регионувустан делегацияны Баштайгыларның регионалдыг салбырының Чөвүлел даргазы Эртине Куулар баштаан. Тывадан төлээлерни регионалдыг салбырның ниити хуралынга бадылаан. Оларга школачылар Ай-Хаан Монгуш, Батаа Санчат, Дамба Монгуш, Байлак Монгуш, ТывКУ-нуң төөгү факультединиң студентизи Чайынды Мартый-оол база Тожу кожууннуң Тоора-Хем школазының аныяк башкызы Чаян Хертек хамааржыр. Съезд – Баштайгыларның дээди удуртукчу органы. Ол ада-иелерниң, уругларның, дагдыныкчыларның кижизидилге ажыл-чорудулгазынга кады ажылдажылгазында кол девискээри болур. Ук хемчег март 26-28 хүннеринде «Россия» национал төпке болур эртер. Аңаа чурттуң 89 регионундан ийи муң ажыг кижи киржир. Мира КОНГУЛ-ООЛ белеткээн. Чуруктар Движение Первых | Тыва