«ДВИЖ» школачыларның шуулганы
Аныяктар ордузунга «ДВИЖ» школаларның медиа-албаннарының республика чергелиг ийиги шуулганы болуп эрткен. Аңаа республиканың школаларындан барык 200 хире өөреникчи киржип келген. Оларның аразында эрткен чылгы киржикчилер база бар. Бо үе дургузунда республиканың школаларында медиа-төптер тургустунгулаан. Уруглар боттары медээлерни белеткеп, школа амыдыралындан видеосюжеттерни кылып эгелээн. "Тываның аныяктары" солуннуң редакциязы Чөөн-Хемчик, Таңды, Өвүр кожууннарның төлээлери-биле чугаалажыр аргалыг болган. (Материалды долузу-биле "Тываның аныяктары" солуннуң октябрь айда үндүрүлгезинден номчуп болур).
Аңаа медиа адырга хамаарышкан янзы-бүрү угланыышкынныг шөлчүгештер ажылдаанын сагындыраал. А хемчегниң кол аалчызы Россияның #Движение_первых организацияның медиакоммуникациялар департаментизиниң регионнар-биле ажылдаар килдизиниң начальниги Андрей Перцев болганы чугаажок. Спикерлер угланыышкын аайы-биле уругларга солун таныштырылганы кылган.
