Дус-Дагда салдынган чаа тураскаалдар
Эрткен чылдың ноябрьда тыва чогаалдың кавайы дижир Дус-Дагга Чогаалчылар сесерлии ажыттынган, аңаа беш чогаалчы: Виктор Көк-оол, Степан Сарыг-оол, Донгак Бегзи, Владимир Серен-оол, Деспил-оол Санчы оларның хөрек тураскаалдарын тургускан турган.
Бо чылын ол чаагай ажыл-үүле уламчылааны онзагай. 95 харлапкан Тываның Улустуң хөөмейжизи, бот-тывывынгыр композитор, шүлүкчү, культура ажылдакчызы, чонунга “Артист” деп адаткан Кызыл-оол Донгакович Санчы болгаш 85 харлапкан чогаалчы, журналист, очулдурукчу Эдуард Люндупович Донгак оларга тураскаалдарны чаңгыс чер чурттуглары салган. Эдуард Донгактың хөрек тураскаалын Чогаалчылар сесерлиинге май 22-де тургускан, ол-ла хүн Санчы Кызыл-оолдуң хөгжүм херекселинде ойнап, хөөмейлеп орар тураскаалын ооң адын эдилээн Культура бажыңының чанында тургускан. Ол тураскаалдарны чогаалчыларның төрелдери, чоок кижилери боттарының чыгган акша-хөреңгизи-биле тургусканын онзалап демдеглеп болур.
Ол хүн дус-дагжылар, чогаалчыларның төрел-дөргүлү, ырак-чооктан аалчылар Дус-Даг суурга чыглып, байырлыг хемчегни Чогаалчылар сесерлиинге болгаш культура бажыңынга демниг, бедик көдүрлүүшкүннүг эрттирген. Ырак Бай-Тайгадан Э. Донгактың кады төрээн дуңмазы Валерий Донгак өөнүң ишти, оглу-кенни-биле, Кызылдан чээни Орлан Ламалдай өөнүң ишти-биле, чогаалчының оглу Эдуард Эдуардович Донгак, К. Санчының уруглары Клара, Комуна, Саина олар база келген. Өске-даа аалчылар, төрелдер, Өвүр кожуун, Дус-Даг суму чагыргазының, Төлээлекчилер хуралының төлээлери хемчегге киржип келгилээн. Тыва Республиканың чогаалчылары: Россияның чогаалчылар эвилелиниң Тыва регионалдыг салбырының даргазы, Тыва Республиканың Улустуң чогаалчызы Николай Куулар, Россияның чогаалчылар эвилелиниң кежигүннери, шинчилекчи эртемденнер Радион Донгак, Ульяна Донорова, аныяк чогаалчылар Эрик Донгак, Мөңгүн-Сай Ондар, Бай-Белек Монгуш болгаш Тыва Республиканың Улустуң хөөмейжизи, “Хөөмей” академиязының база бүгү делегейде сурагжаан “Алаш” бөлүүнүң удуртукчузу Бады-Доржу Ондар база улуг өгбелерге хүндүткелин илергейлеп чедип келген.
Дус-Дагжылар, төрел чогаалчыларның салгакчылары аалчыларын эки уткуп-хүлээп, хемчеглер эрттиреринге идепкейлиг киришкеннер. Аалчылар Торгалыг ортумак школазында Степан Сарыг-оол аттыг чогаал музейинга база барып, ооң ажылын сонуургааннар. Музей эргелекчизи Светлана Седен-оол башкы нептереңгей тайылбырны кылган.
Ам Дус-Дагда чеди чогаалчыга тураскаалдарны чоннуң, төрелдериниң идепкейи, деткимчези-биле, изиг күзели-биле тургусканы бо. Тывада онзагай суурнуң чурттакчылары аңаа доктаавайн, тус чер чурттуг чогаалчыларга мөгейиишкинниг ажыл-херээн уламчылаар сорулгалыг.
Тываның чогаалчылары бөлүктүң чуруу болгаш медээзи
