«Өг-ном» чаа төлевилел: Уруглар өг дугайында билиин делгемчиткен

Россияда Эртем хүнүнге уткуштур Национал школа хөгжүдер институттуӊ ажылдакчылары школа, техникумнарже үнүүшкүннерин уламчылап турарын институт дыңнаткан. Институттуң өөредилгениӊ этнокультурлуг талазы-биле ажылдап турар лабораторияныӊ ажылдакчылары А.А. Саая, С.В. Ондар Кызылдыӊ дугаары 9 гимназиязынга «Өг-ном» деп чаа эгелээшкинниг мастер-клазы-биле аалдап четкен. Аӊаа 6-7 класстыӊ уруглары шупту 25 өөреникчи, ийи башкы идепкейин көргүзүп, өг дугайында билиин делгемчидип, ооӊ хевиринге белеткеп, кылган номчугашты боттары кезип, чыып кылганнар. Номчугаш иштинде бижиттинген үлегер домактарныӊ чартыын тып, өгнүӊ тургузуун, херекселдерин көрүп тургаш ушта бижээн. Уруглар кылып алган өг-номчугажын өг-бүлезинге көргүзери-биле ап алганнар. Чаа эгелээшкинниг төлевилелди ам-даа уламчылаарын ажылдакчылар дыңнаткан. Өөрүнчүг, демдеклексенчиг чүүл – школаныӊ уруглары тыва дылын билир, хостуг чугаалаар болганы. #тмг