Чонга деткимче
Сөөлгү чылдарда Чонну ажылга хаара тудар төптер таварыштыр национал төлевилелдер, федералдыг күрүне программалары боттанып турар. Республиканың янзы-бүрү булуңнарында ук төптерниң ажылдакчылары чонга арга-сүмезин кадып, оларның хууда херээн ажыдып алырынга улуг дузазын көргүзүп чоруур. Оларның аразында аныяк специалист Рустам Монгуш-биле таныжыңар, аныяк номчукчу.
Рустам Монгуш Кызыл хоорайның 5 дугаар школазын дооскаш, А.Н. Косыгин аттыг Россияның күрүне университединче дужаап киргеш, юрист эртемни чедип алган.
Дээди өөредилге черин дооскаш, ол «Тува 24» телеканалга корреспондент кылдыр күш-ажылчы базымнарын эгелээн. Ооң соонда ТР-ниң Бойдус курлавырлары болгаш экология яамызының парлалга секретары, регионнуң Юстиция яамызынга, А.С. Пушкин аттыг Национал библиотекага ажылдаан. Ол - амгы үеде Кызыл хоорайның Чонну ажылга хаара тудар төвүнде кол инспектор.
«Юрист эртемниг кижи болганымда, бодумнуң кол ажылымдан аңгыда, хамаатыларның социал керээ талазы-биле бизнес төлевилелдерин шилиир комиссияның ажыл-чорудулгазында киржип, оларга юридиктиг дузаны көргүзүп турар мен. Чурттакчы чон аңгы-аңгы социал айтырыгларлыг болур, социал керээни канчаар алырыл дээш оон-даа өске. Колдуунда Чонну ажылга хаара тудар төптерниң янзы-бүрү ачы-дуза чедирилгезинге хамаарышкан айтырыглар болур» — деп, аныяк специалист таныштырган.
Чамдык чурттакчыларга «Демография» федералдыг программа езугаар халаска өөредип турарын сагындыраал. Оон аңгыда социал керээ үш угланыышкынныг: биче бизнести деткиири, хууда дузалал ажыл-агыйын ажыдары (350 муң рубль) база ажылга тургузары.
«Тываның девискээринде чурттакчы чон колдуунда хол-биле кылыр ажыл-агый ажыдып турар. Чижээлээрге, эр улус автомашиналарның техниктиг көрүлдезин чорудар черлерни, а херээжен улус идик-хеп даараар азы кондитер цехтери ажыдар. Ажылым дыка солун. Чүге дизе хүннүң-не чаңгыс чер чурттугларымга дузалажып турар мен. Юрист кижи база-ла МИЧ ажылдакчылары ышкаш чон-биле чугаалажыр, оларга шын тайылбырны кылыр» - деп, Рустам Монгуш түңнээн.
Мира КОНГУЛ-ООЛ очулдурган
Мерген ОНДАРНЫҢ тырттырган чуруу
