Четки оюннары ада-иениң банк картазындан акша-хөреңгини оорлаарынга чедирер

Банк карталарындан акша-хөреңги оорлаар чорук удаа-дараа болуп турар. Кограан кижилерниң аразында ада-иелер, кырган-ава, кырган-ачалар бар. Ооң бир кол чылдагааны: уруг-дарыг Roblox, Standoff 2 база Minecraft деп четки оюннарын ойнап турарында. Мөлчүкчүлерниң хоойлу-дүрүмге дүүшпес үүлгедиглерин болдурбазы-биле хемчеглер дугайында Тывада Баштайгылар шимчээшкининиң регионалдыг салбырының чөвүлел даргазы Эртине Куулар сагындырган. «Четки оюннарының каттыжылгаларында мөлчүкчүлерниң идепкейлиг апарганын сагындырыксадым. Эң ылаңгыя ол иштики оюн экономиказы хөгжүлделиг Roblox, Standoff 2 болгаш Minecraft платформаларга хамааржыр. Хөй кезиинде блогерлерниң болгаш стримерлерниң меге арыннарын ажыглап турар. Олар акцияларга киржирин сүмелеп, валюта азы скин ойнап алырын кыйгырып турар. Бо саналдың адаа-биле ада-иезиниң банк карталарының медээлерин, логиннерин азы чажыт саннарын дамчыдып бээринче ыдалаар. Ындыг «чугаалажыышкынның» түңнели – ада-иениң банк картазындан акша-хөреңгини оорлаарынга чедирер» - деп, Эртине Куулар демдеглээн. Мира КОНГУЛ-ООЛ белеткээн Чурукту социал четкилерден алган