Чечек Салчак «Чылдың башкызы» мөөрейге киржир

Тываның улустуң башкызы П. А. Морозов аттыг Аграрлыг лицейниң эге класстар башкызы Чечек Салчак республиканың «Чылдың башкызы» мөөрейниң «Аныяк специалист» номинациязынга киржир. «Бичии чаштарның чоок өңнүү, дагдыныкчызы, сүмелекчизи болур дээш кызып турар мен. Уруглар-биле харылзаавыс ажыл-херекчи-даа болза, аравыста кады ажылдажылга, бүзүрел кол черни ээлеп турар. Оларның-биле шын чугаалажылганы тургузуп алырга-ла, класска таарымчалыг байдалдарның эге дөзү деп бодаар мен. Бо бүгү чүүлдер өөредилге-кижизидилге ажылының үре-түңнелин тодарадыр. «Чылдың башкызы» республика мөөрейинге киржири-биле мени лицейивистиң башкылары деткээн. Оларның арга-сүмези чок болза, чаңгыс кижиге берге болуру чугаажок» - деп, аныяк башкы Чечек Салчак демдеглээн. Аныяк башкы моон-даа соңгаар янзы-бүрү мөөрейлерге, бүгү делегей чергелиг төлевилелдерге киржип, бодунуң билиин бедидер сорулгалыг.