Чүс алдан ажыг өг-бүле социал хөмүр-дашты алыр

Улуг-Хем кожуунда "Социал хөмүр-даш" төлевилел-биле 162 өг-бүле одаар хөмүр-дашты алырын чагырга чери дыңнаткан. 162 өг-бүлениң 60-ны Шагаан-Арыг хоорайдан, Хайыракандан – 21, Арыг-Бажындан – 9, Ийи-Талдан – 10, Торгалыгдан – 22, Чодураадан – 4, Эйлиг-Хемден – 10, Арыг-Үзүүнден – 8, Арыскандан – 6, Иштии-Хемден – 12. Эрткен чылын социал хөмүрнү 232 өг-бүле ап турган болза, бо чылын алыр өг-бүле саны кызырылган. Чылдагааны – өг-бүлелерниң ажы-төлү назы-хар чеде бергенинден ийикпе азы орулгазы көвүдей бергенинден социал дузаламчы алыкчыларының саны эвээжээн. Өг-бүлеге болгаш уругларга социал дуза чедирер төп таварыштыр деткимче алыр өг-бүлелерден аңгыда, бо чылдан эгелеп тускай шериг операциязының киржикчилериниң өг-бүлелери база одаар чүүлдү алыр. Бо дузаламчыны тускай шериг операциязынга киржип тургаш амы-тынындан чарылган, ис чок читкен, бертик-межел чанып келген дайынчыларның өг-бүлелери алыр. Ниитизи-биле 104 өг-бүлеге хөмүр-дашты дүжүрери көрдүнген.