Чаштарның өрээлин септээн

Чайгы үе – өөредилге черлеринде болгаш уруглар турар тускай социал төптерде чаартылга ажылдарының үези. Кызылдың берге байдалга таварышкан өг-бүлелерге дуза чедирер төвүнде база чайгы септелге кидин түлүк. Чаартып будуур, эде-хере тыртар чүүл көвей, оларга шуптузунга төптүң башкылары болгаш кижизидикчилери идепкейлиг киржип турбуже, чамдык аар-берге ажылга оларның хол күжү чедишпестеп эгелээн. Бичии бөлүктүң удуур өрээлиниң шалазы эргилээш, солуур үези келген турган. Ону эдип-чазаар, санап хемчээри-биле башкылар хөй чылдар дургузунда дуза чедирип чоруур Росгвардия ажылдакчыларынче сөстү дамчыткан. Ол-ла хүн дайынчылар демнежип алгаш, чогуур ажылдарны чоруткан. «Ада-иезинден түр када чарылган ажы-төлдү кээргеп, оларны карактажып чорууру - бир кол харыысалгалыг даалгавыс деп санаар бис. Чылыг, чырык черге чурттап, ойнап турар болза, оолдар-уруглар дыка муңгаравас деп идегеливис улуг. Септелге ажылынга киржири бистиң сагыш-сеткиливиске өөрүнчүг-дүр», - деп, росгвардейжи Чингиз Ооржак демдеглээн.