Чаа школаларга ажылдаар башкыларны четчелээр

Тываның Баштыңы Владислав Ховалыг республикада аныяк башкыларның деткимчези уламчылап турарын сагындырган. «Мой учитель/Мээң башкым» төлевилел езугаар школага күш-ажылчы базымын эгелээн 2025 чылдың дээди өөредилге черлериниң доозукчулары чаңгыс удааның акша төлевирин алыр. Профугланнышкынныг ажылдың түңнели-биле алырга, профильдиг класстарның студентилери педагогика адырын шилип, чурттуң аңгы-аңгы дээди өөредилге черлеринде өөренип турарлар. Ооң-биле чергелештир Тываже 300 ажыг аныяк башкыны хаара туткан. «Амгы үеде бистиң мурнувуста чаа туттунган школаларга башкыларны четчелээр ажыл бар. Тываның Өөредилге яамызы педагогика мергежилин чедип алган доозукчулар ортузунда чаңгыс удааның төлевирин алыры-биле, мөөрейни чарлаан» - деп, Владислав Ховалыг демдеглээн. Мөөрей август 8-тен сентябрь 1-ге чедир үргүлчүлээр. Ооң тиилекчилери ийи дакпыр чедимчелиг болур: чаа туттунган школаларга таарымчалыг байдалдарга ажылдап эгелээри база мергежилиниң аайы-биле чедиишкинниг ажылдаарынга материалдыг деткимчени алыр. Чурук социал четкилерден.