Чаа-Хөлде хөмүр-даш чедирилгези уламчылап турар

Чаа-Хөл кожуунда хөй ажы-төлдүг өг-бүлелерге хөмүр-даш чедирилгези уламчылап турарын чагырга чери дыңнаткан. Булуң-Терек болгаш Ак-Дуруг сумуларының 33 өг-бүлези одаар чүүлдү алган. Тывада хөй ажы-төлдүг 2856 өг-бүле 2024 чылда одаар ыяшты болгаш хөмүр-дашты халас алырын сагындыраал. Хөмүр-дашты бо хевирниң ачы-дуза алыкчылары чурттап турар 114 чурттакчылыг черлерже октябрь 30-ге чедир чедирер. «Социал хөмүр-даш» төлевилелиниң күүселдезин республиканың Күш-ажыл база Одаар чүүл болгаш энергетика яамылары харыылап турар. Төлевилелде киржип турар өг-бүле бүрүзүн регион бюджединиң акша-хөреңгизи-биле 2145 кг хөмүр-даш азы 4,8 куб метр одаар ыяш-биле хандырып турар. ТМГ