"Бис - Чыргал-оолдуң төлдери бис" отчеттуг концерти болуп эрткен
Москвага Гнесиннер аттыг Россияның хөгжүм академиязынга Кызылдың уран чүүл колледжизиниң сургуулдарының "Бис - Чыргал-оолдуң төлдери бис" отчеттуг концерти болуп эрткен. Ооң дугайында Тываның Баштыңы Владислав Ховалыг мынчаар демдеглээн.
Владислав Ховалыг, Тываның Баштыңы:
"Бир дугаар Москвага Гнесиннер аттыг Россияның хөгжүм академиязынга Кызылдың уран чүүл колледжизиниң сургуулдарының "Бис - Чыргал-оолдуң төлдери бис" отчеттуг концерти болуп эрткен.
Хемчегни баштайгы тыва композитор Алексей Боктаевич Чыргал-оолдуң 100 харлаанынга тураскааткан. Колледжтиң сургуулдары болгаш башкылары тергиин көргүзүглерин бараалгаткаш, уран талантызы-биле көрүкчүлерни магадаткан.
Чыргал-оолдуң музыказы онзагайы болгаш ханы уткалыы-биле ылгалып турар, ында тыва культура болгаш езу-чаңчылдар сиңниккен. Ынчангаш концерт көрүкчүлерниң деткимчезин алган, олар кайгамчык үннерниң болгаш сагыш-сеткил хайныышкынынче шымныккан".
