Бүгү Россияның "Чылдың өг-бүлези" мөөрейниң тиилекчилери болган
"Чылдың өг-бүлези" бүгү Россияның мөөрейинге киришкен Инга Монгуш биле Демир Дамчааның өг-бүлези "Аныяк өг-бүле" номинацияның тиилекчилериниң аразынче кирген. Аныяктарга Тываның Баштыңы Владислав Ховалыг байырны чедирген.
Владислав Ховалыг, Тываның Баштыңы:
- Инга Монгуш биле Демир Дамчааның өг-бүлези Москва хоорайдан ээп келгеннер. Олар чурттуң Президентизи Владимир Путинниң чарлааны Өг-бүле чылында "Чылдың өг-бүлези" бүгү Россияның мөөрейинге киришкени - улуг болуушкун болуп, "Аныяк өг-бүле" номинацияның тиилекчилериниң бирээзи болганнар.
Дамчаа-Монгуштарның өг-бүлези 10 ажы-төлдүг. Демир Александрович –"Транспорт сервизи болгаш төлевилели" КУБ-туң чолаачызы, Инга Владимировна - башкы эртемниг, Сукпак суурнуң Культура төвүнде ажылдап чоруур. Олар - төрээн суурунда хөй-ниити амыдыралының идепкейжилери, чаагайжыдылга төлевилелдериниң эки турачылары. Уруглары тергиин эки өөредилгелиг, секция, бөлгүмнерже барып турар.
Тываның төлээлери "Чылдың өг-бүлези" бүгү Россия чергелиг мөөрейниң 6 удаа тиилекчилери болуп турганын демдеглекседим. Олар - "Алдын өг-бүле", "Көдээ черниң өг-бүлези", "Аныяк өг-бүле" номинацияларның тиилекчилери. Мөөрейниң регионалдыг чадазын чыл санында бүгү делегейниң Өг-бүле хүнүнде эрттирип турар бис. Ооң лауреаттарынга 15 муңдан 50 муң чедир акша сертификаттарын тыпсыры чаңчылчаан. Тываның үлегерлиг өг-бүлелериниң чуруктары Өг-бүле парыгының Хүндүлел самбыразын каастап турар.
Владислав Ховалыгның социал четкилерде арынындан А. Нан-Хоо белеткээн.
