Бүдүн Тыва Ксения Монгуш-биле кады: комментарийге чедиишкинни күзээлиңер!

Шагаан-Арыг хоорайның 1 дугаар школазының өөреникчизи Ксения Монгуш бүгү Россияның "Большая перемена" мөөрейиниң чартык түңнелинче кирген. Республиканың аныяктар херектериниң талазы-биле агентилелиниң саң-хөө деткимчези-биле Ксения өске-даа муң-муң мөөрейниң киржикчилери ышкаш "Океан" бүгү Россияның уруглар төвүнге октябрь 19-та чедер аргалыг болган. "Тывадан чартык финалче чүгле чаңгыс Ксения кирген. Ынчангаш аңаа бистиң республикавыска "Большая переменаның " келир үеде салым-хуузу дээш улуг харыысалга болгаш хүлээлге онааттынган. Бүгү Россия чергелиг хемчеглерге бодунуң регионундан чааскаан киржири кайы хире дээрзин дыка эки билип тур мен. Долгандыр он-он аныяктар командазы-биле бергелерни эртип турда, а сен чааскаан. Ынчангаш 15 харлыг Ксения-биле бүдүн Тыва кады. Организаторларның белеткээн кейстеринде даалгаларын Ксенияның күүседир үези чоокшулап келген. Октябрь 19-та мөөрейге Тываны төлээлеп чедер Ксенияны смс-дыңнадыглар-биле деткип, аңаа төлевилел ажыл-чорудулгазын эртип алырынга бүгү күжүн мөөңнээрин күзээлиңер" - деп, республикада "Большая перемена" шимчээшкининиң куратору Дугэр Салчак бодунуң блогунда бижээн. Алена Нан-Хоо