Баяна Сат школазын бедик деңнелге камгалаан
ТА
Туранның 1 дугаар ортумак школазының төөгү башкызы Баяна Сат «Чылдың башкызы-2024» Россия чергелиг мөөрейге киришкен. Чурттуң шупту регионнарындан 90 кижиниң аразындан чүгле 20 башкы түңнел мөөрейниң шилилгезин эрткен. Мөөрейниң тиилекчизин октябрь 5-те, Башкының хүнүнде, чарлаар.
Баяна Сат школазын бедик деңнелге камгалаан. Эң-не кол шенелделерниң бирээзи – Византияның Культуразынга хамаарышкан темалыг кичээлди алдыгы классчыларга тулган эрттиргеш, бодунуң сорулгаларын чедиишкинниг күүсеткен.
«Сценаже бир дугаар үнери черле сүрээденчиг, эң ылаңгыя сени долгандыр камералар болгаш жюри кежигүннери хайгаарап турда. Ынчалза-даа ол чугула арга-дуржулга болур» - деп, башкы демдеглээн.
Эрткен субботада башкы эксперттер-биле чугаалажыышкын чадазын эрткен. Мөөрейниң ийиги чадазында башкылардан чүгле тергиин билигни эвес, а амгы үениң өөредилгеге хамаарышкан айтырыгларынга шалыпкын, бүзүрелдиг харыылап билири негеттинген.
Алена Нан-Хоо
Чуруктарны социал четкилерден алган
