Башкының болгаш дагдыныкчының чылында: салгал дамчаан башкылар

Улуг-Хем кожууннуң Эйлиг-Хем сумузунда Дамдыннарның өг-бүлезиниң ниити башкы ажылының стажы 80 чыл ашкан. Башкылар династиязының эге оруун Март-оол Кыргысович Дамдын эгелээн. Ол башкы институдунуң төрээн дыл талазын дооскаш, 42 чыл иштинде уругларны эртем-билигге өөредип келген. Ол - Улуг-Хем кожууннуң хүндүлүг чурттакчызы, ТР-ниң алдарлыг ажылдакчызы, күш-ажылдың хоочуну. Башкы ажылын ооң оглу Владимир Дамдын уламчылаан. Ол ТывКУ-нуң күш-культура болгаш спорт факультедин дооскан. Владимир Март-оолович Дамдын Эйлиг-Хем ортумак школазының директору болуп үр чылдарда ажылдап чоруур. Ооң чедимчелиг ажыл-ижин кезээде үнелеп, янзы-бүрү чергениң шаңналдарын тывыскылаан. Владимир Дамдын - "Күш-культураның болгаш спорттуң тергиини" аттың эдилекчизи, ТР-ниң алдарлыг ажылдакчызы, РФ-тиң чырыдыышкын болгаш кижизидилгениң хүндүлүг ажылдакчызы. Владимир Дамдынның улуг оглу Түмен Владимирович адазының соон изээн. ТывКУ-нуң күш-культура болгаш спорт факультедин дооскан. Ак сеткилдиг күш-ажылы дээш "Улуг-Хем кожууннуң тергиин башкызы" атка төлептиг болган. Ол ышкаш өске-даа шаңнал-макталдарга төлептиин көргүзүп чоруур. Хеймер оглу Доржу Владимирович Эйлиг-Хем ортумак школазында тренер башкы болуп ажылдап чоруур. Ол Кызылдың башкы колледжизин дооскан. Акызы, ачазы ышкаш спортчу. Улуг-Хем кожууннуң өөредилге эргелелиниң медээзинден Алена Нан-Хоо белеткээн. #год_наставника Тыванын аныяктары/Молодежь Тувы