Ажыл чок кижилерниң саны 30% кызырылган
Тываның Баштыңы Владислав Ховалыг республикада ажыл чок чорук 30 хуу кызырылганын демдеглээн.
«Тывада албан езу-биле 5,6 муң ажыл чок кижи бүрүткеттинген. Ол дээрге, эрткен чылга бодаарга, 30 хуу эвээш. Социал керээ езугаар деткимче, чонну ажылга тургузар төптерниң чаартылгазы болгаш ажыл ярмаркалары үре-түңнелдиг болуп турар» - деп, ол бодунуң блогунда бижээн.
Республиканың девискээринде документ-саавыр чокка ажылдаары болгаш түр ажылдар сайзыраанын ол демдеглээн. Сөөлгү 6 айның дургузунда 573 кижи ажыл-агый хамаарылгазын бүрүткээн. Чыл төнчүзүнге чедир ам-даа ол хире кижини хоойлу езугаар бүрүткээр сорулга салдынган. Колдуунда садыг-саарылгада, көдээ ажыл-агыйында, тудуг адырында, пассажирлер сөөртүлгезинде күш-ажыл керээзи чокка хамаатылар ажылдап турар.
