Аныяктарның эрге-хоойлу талазы-биле билиин бедиткен
Тыва Республиканың Дээди Суду школачылар болгаш студентилерниң эрге-хоойлу талазы-биле билиин бедидер ажылды чорудуп турар.
Бо чылдың дургузунда шүүгү органы 200 ажыг школачыны, дээди болгаш ортумак өөредилге черлериниң студентилерин хаара тудуп, хемчеглерни эрттирген.
Ужуражылгалар үезинде судтуң оран-савазының девискээринге экскурсияны чорудуп, уругларны суд хуралдарынга киириштирип, кеземче болгаш административтиг харыысалга дугайында лекцияларны кылып, эрге-хоойлуга хамаарышкан квест-оюннарны чоруткулаан.
Аныяк-өскенге өөредиглиг лекцияларны шииткекчилер болгаш оларның дузалакчылары кылып турар. Оон аңгыда Тыва Республиканың шүүгү системазының төөгүзүнүң Музейин оолдар, уруглар онза сонуургаан.
Башкылар болгаш класс удуртукчуларын шүүгү органнарының ажылдакчылары РФ-тиң Үндезин Хоойлузунуң хүнүнде база Юристиң профессионал хүнүн таварыштыр темалыг ужуражылгаларны эрттирип, кады ажылдажылгаже чалап турар.
Шүүгү ажылын сонуургаар аныяк-өскен дараазында дугаарже долгааш, янзы-бүрү хемчеглерге киржип болур: 9-48-31.
