Аныяк шүлүкчү

Соруктуг Шивитпей Улуг-Хем кожууннуң Шагаан-Арыг хоорайынга 1999 чылдың август 15-де бөдүүн өг-бүлениң хеймер оглу болуп чаяаттын­ган. Школачы чылдарында шүлүк чогаалын шенеп бижип эгелээн. 2017 чылда Арыг-Үзүү ортумак школазын чедиишкинниг дооскаш, ол-ла чылын Тываның күрүне университединге кирип алган. Ук өөредилге черинде филология факультединде «Сорунза» чечен чогаал каттыжыышкынының кежигүнү. «Тыва Мотиватор», «Шын», «Улуг-Хем» солуннарынга шүлүктерин үндүрген. 2022 чылда Тываның чогаалчылар эвилелиниң удуртуп эрттиргени «Аныяк шүлүкчү» мөөрейинге чедиишкинниг киришкеш, 2-ги черге төлептиг болган. Өске кижи Хары хейниң эргеледии, Сагыжыңга эки-дир бе? Хайыралдыг эжиң мени, Сактып келгеш канчап чор сен? Өске кижи өпейинге, Өзү-баарың чылып чор бе? Сактыышкынның ханызында, Сарыың меңээ чедер-дир бе? Карактарың чыраан оду, Канчап чүге муңгак болду? Кара чаңгыс эжиң чокта, Кандыг-дыр че өске кижи? Сактыышкын «Будуктуг ыяштың кыры-биле, Булуттуг дээрниң адаа-биле, Ырак черде эжим сенче Ырлыг чагаам шелип ор мен ...» Шак-ла мындыг чагааларым, Шагаан-Арыг хоорайже-ле Чаңгыс эвес шуужуп турган Чаптанчыг-ла чашкы үем. Чагаам алгаш, харыы ыдар Чараш уруг ам бо хүнде Өпей ырын салып орар Өглүг-баштыг ава болган. Салымывыс кокпалары Сени, мени доңнаштырбаан, Ынчалза-даа чашкы шаавыс Ындын ыры бисти кагбаан. Пөрүк ынакшыл Чаның-биле каржып эрткеш, Чандыр черле көрбес мен чоп. Сонуургааным күштүү ол бе? Сооңче көрүп артып каар мен. Үнер-кирер эжик чаңгыс Үргүлчү-ле душчуп кээр бис . Каржып эрткен санымда-ла, Караам көзү чүгле сенде. Дидимненгеш чугаа ээреп, Диттип черле шыдавас мен. Сенчилеп каан хаалга дег, Сеткил-чүрээм таан пөрүк. Таптыг-дыр бе? Үезинде сактыр боор сен, Үер суунда байлаңнар дег, Чеже оолдуң ортузунга Чечектелип чорааныңны. Шырай-арнын холуй көрүп, Шыдал-күжүн бодап тургаш, Уштулаңнааш бир-ле төлге Ушкажыпкаш чорупкан сен. Суур санай дидир-дидир, Сурааң үнген, чанып келдиң. Сурас төлдүг, дулгуяк бооп, Суму черден ыравадың. Далдап чорааш таска дүштүң. Таптыг-дыр бе? Ол бир кижи. Соруктуг ШИВИТПЕЙ. #тыванын_аныяктары солуннуң март айда үндүрүлгезинден.