"Алхимик" эртем лагери школачыларны манап турар

"Алхимик" эртем лагери июнь 5-тен тура республиканың школачыларынга эжиктерин ажыдар. Хөй ажы-төлдүг өг-бүлелерниң уруглары халас кээп болур. Ол дугайында ТывКУ-нуң парлалга албаны дыңнаткан. Ук лагерь ТывКУ-нуң студентизи Шеңне Монгуштуң төлевилели болур. Ол бодунуң эртем удуртукчузу, химия кафедразының доцентизи, х.э.к. Ольга Кендиван-биле Росмолодежьтуң мөөрейинге тиилээннер. Грант акшаландырыышкыны-биле "Алхимик" эртем лагери социал төлевилел ТывКУ-га боттаныр. "Бис чүгле уругларның чайгы дыштанылгазын шын ажыглаарынче эвес, а эртем-шинчилел ажылын сайзырадып, школачыларның эртем талазы-биле билиин хевирлеп турар бис" - деп, Шеңне Монгуш чугаалаан. Лагерьниң ажылы июнь 5-тен 21-ге чедер. Уруглар эртенгиниң 9.00 шактан 15.00 шакка чедир лагерьге дыштаныр. А. Нан-Хоо. #чайгы_дыштанылга