Александр Суворовтуң медалының эдилекчизиниң хууда ажыл-херээ

Тес-Хем кожуундан тускай шериг операциязының киржикчизи Арат Бадарчы социал керээге үндезилээн күрүне деткимчезиниң ачызында демир кылыглар бүдүрүлгезин ажыдып алганын чагырга чери дыңнаткан. Эгелеп чоруур сайгарлыкчы – үшкү салгалдың каңнакчызы. Ооң кырган-ачазы Брат-оол Малчынович, ачазы Роман Брат-оолович тус черниң чурттакчыларынга демирден кылыгларны кылып турган дарганнар. Арат Бадарчы тоску класстың өөреникчизи тургаш-ла электри дуңзаалакчызынга печка одалгазын тургузарынга дузалажып турган. Кызылда дөрт дугаар профучилищени дооскаш, 2014 чылда шериг албан-хүлээлгезин күүседири-биле аъттаныпкан. Дайынчы улаштыр 55-ки гвардейжи мотоадыгжы даг бригадазы-биле керээни чарып, Россия Федерациязының Чепсектиг күштеринге сес чыл шериг албанын эрттирген. Дайынчы хөделиишкиннер девискээринден келгеш, каңнаашкын херээн ус-шевер уламчылаан. Ол чаңгыс классчыларын эвилелдеп, оларның-биле кады электри-биле каңнаар болгаш демир шуткуур ажылдарны шынарлыг болгаш үезинде кылып турар. Амгы үеде дарганнар чүгле тус черниң чурттакчыларындан эвес, а кожа Эрзин болгаш өске-даа кожууннардан чагыгларны хүлээп ап турар. Найысылалдан чагыдып алыкчылар база бар. Арат Бадарчы херим, хаалга, печка, ажык отка эът быжырарларны база дыштанып олурар сандайларлыг черлерни улус хөйү-биле чагыдып ап турарын демдеглээн. Ол билиг-мергежилин улам бедидип, республиканың ус-шеверлеринден өөренип ап турар. Дайынчы хөделиишкиннер хоочуну тускай шериг операциязының үезинде көргүскен эрес-маадырлыг чоруу дээш, Александр Суворовтуң медалы-биле шаңнаткан.