Айыткал аныяктарның арга-шинектерин ажыглаарынга дузалаар

Наталья Донгур – Росмолодежь.Бизнес аныяк сайгарлыкчылар клувунуң лидери, DONGUR тыва хеп брендизиниң удуртукчузу. Ол Тываның Баштыңы Владислав Ховалыгның Айыткалынга хамаарыштыр бодунуң бодалын чугаалаан: - Аныяк сайгарлыкчылар клувунуң лидери болганымда, республикавыстың хөгжүлдезинге хамаарышкан шупту социал ужур-уткалыг хемчеглерже угланган акцентилерни дыңнаары өөрүнчүг болду. Оон аңгыда Владислав Ховалыгның демдеглээни-биле, эки турачыларга деткимче көргүзери – идепкейлиг ниитилелди хевирлээринге болгаш кижилер аразында харылзааларны быжыглаарынга чугула базым болур. Ол чүүл аныяктарниң янзы-бүрү төлевилелдерге киржип, боттарының арга-шинектерин ажыглаарынга дузалаар. Ол ышкаш тыва дылды чурагайжыдар капсырылгаларга грант деткимчезин тургусканын, Тываның төөгүзүнүң дугайында өөредилге номнары дээш оон-даа өске ажыктыг айтырыгларны Тываның Баштыңы чугаалаан. Ниитизи-биле Айыткал республиканың хөгжүлдези дээш сагыжы аарып чоруур хамааты кижи бүрүзүн моон-даа соңгаар каттыштырып, хей-аъдын көдүрүп турар. Бис, аныяк активчилер, Тываның сайзыралынга үлүг-хуувусту киирип, айыттынган эгелекчи саналдарны амыдыралга боттандырарынга идепкейлиг киржиринге белен бис. #послание