Материал 4401

Владислав Ховалыг: Тыва дыл - чоннуң өнчүзү! Тыва республиканың баштыны Тыва дыл хунун таварыштыр байыр чедирген. - Бурун тыва чонумнуң өске чоннардан ылгалып, бот-тускайлаңын бадыткаан байырлал - өндүр Тыва дылывыстың хүнү-биле! Делегейде чүс-чүс дылдар-биле бир дөмей, бистиң тыва дылывыс күрүне дылы эрге-байдалдыг дээрзин Тыва Республиканың Үндезин хоойлузунда айыткан. Тыва дылывыстың байлаан, чечен-мергенин, чаражын төрээн дылывыста парлаттынып турар өөредилге номнарындан, хөй санныг сеткүүлдерден, тыва дылда радио-, теледамчыдылгалардан көрүп, дыңнап чор бис. Назы четпээн уруглар албан черлеринде, школаларда тыва дылдың болгаш чогаалдың кичээлдеринден төрээн дылывысты өөренип, алдар-аттыг чогаалчыларывыстың уран-чечен чогаалдарын танып, өөренип турары - төрээн дылывыска хүндүткел. Ындыг болзажок, амгы салгалдың ажы-төлү тыва дылывысты уттуп бар чыдары дүвүрелди оттуруп турар. Ававыстың аа сүдү-биле ээп өскеш, сөөкте-ханда сиңе берген ыдык дылывысты салгалдарывыска арыг-чараш, бай-байлак кылдыр арттырып каар деп бодазывысса, уян, чымчак тыва дылывыска каяа-даа чорааш, чугаалажып, ону камнап, нептередип чоруулуңар, чонум! Тыва дылывыстың хүнү-биле, эргим чаңгыс чер-чурттугларым!