Материал 336

«Улуг-Хем кожууннуң стоматологиязында ажылдаар херекселдер, материалдар шуут чок, диш кылыр аппараттары үрелген, ажылдап турар эмчилерге таарымчалыг байдал тургустунмаан. Кожууннуң чурттакчы чону диш эмчилээрде, Кызыл хоорайже чоруур апаар. Уругларның диш эмнээр кабинедин ажыдары-биле, чөпшээрел бижикти база алган дээр, ол хиреде ам-даа чок. Бо четпестерни кожуун эмнелгезиниң улуг эмчилери шиитпирлээрин диледивис» деп, Улуг-Хемниң чурттакчы чону социал четкилерде бижээн. Чонну дүвүредип турар айтырыгга хамаарыштыр #Тыванын_аныяктары солуннуң штаттан дашкаар корреспондентизи Алена Нан-Хоо Улуг-Хем кожууннуң төп эмнелгезиниң улуг эмчизиниң хүлээлгезин күүседип турар Надежда Монгуш-биле харылзашкан. Ооң харыызын номчукчуларга дамчыттывыс. - Социал четкиде бижээн ат чок хомудалга хамаарыштыр тайылбырлаарывыс болза, амгы үеде, шынап-ла, кожуунда диш эмнеп кылыр аппараттар үрелген чылдагааны-биле, аарыг кижилерни хүлээп алыр арга чок болуп турар. Диш эмнээр дериг-херекселдиң артык кезектерин чагыдып алгаш, ону септээн соонда, сентябрь айның төнчүзүнден бээр аарыг кижилерни хулээп болур. Уругларның диш эмнээр кабинединиң чөпшээрел бижиин алган, ындыг-даа болза дериг-херексели коронавирус аарыының нептерээни-биле, 2-3 дугаар кварталдарда саттынмайн турган. Ынчангаш 4 дугаар кварталда ол дериг-херекселдерни чагыгже кииргенивис ол. Эмчилерге таарымчалыг байдал дугайында айтырыг арай тодаргай эвес-тир. Чогум чүү чүвеге таарышпааныл? Эмчи бүрүзү тускай кабинеттиг чонну график езугаар хүлээп ап, ажылдап турар. Диш эмчилери баш удур бижилге-биле аарыг кижини хүлээр. Кабинеттерниң арыг-силиг байдалы санитарлыг нормага дүүшкен. Чурукту Интернеттен алган.