Материал 320

Бичии уругларга орук-транспорт кемдээшкинин болдурбазы болгаш баш бурунгаар сагындырары-биле, «Айыыл чок чоруктуң лабораториязы» деп төп Тывада ажыттынган. Ук лабораторияда автомашина оруунга бодун шын алдынарын болгаш өзүп келгеш, орукка айыыл чок дүрүмнү сагып билир чолаачылар болурунга өөредир. Оон аңгыда аңаа чадаг-терге, самокатты башкарып чорааш, орук шимчээшкинин шын сагыыры дээн ышкаш чүүлдерни база билип алыр. «Айыыл чок чоруктуң лабораториязынга» школа назыны четпээн уруглардан эгелээш, улуг класстарның өөреникчилеринге чедир оюн хевиринге ойнап тургаш, орук шимчээшкининиң дүрүмнерин эки шиңгээдип алыр. Мобилдиг төп Тываның шупту кожуун, суурларын кезип, уругларны орук шимчээшкиннериниң дүрүмнеринге өөредир. Ыраккы суурларның уруглары пассажир база чолаачы кижи канчаар алдынарын караа-биле көрүп, холу-биле тудуп тургаш, өөренип көөр аргалыг болур. Удавас силерниң школаңарга «Айыыл чок чоруктуң лабораториязы» чеде бээр, уруглар.