2022 чылда Тываның сайзыралынга хамаарыштыр

Тыва Республиканың социал-экономиктиг хөгжүлдезиниң тускай программазының төлевилелдерин боттандырары-биле 2022 чылда чартык млрд рубльди чарыгдаар. Ниитизи-биле 1,5 млрд рубльди янзы-бүрү деңнелдиң бюджединден субсидиялар-биле кады салыр. Ук программаның боттанылгазының талазы-биле планны ТР-ниң Экономика яамызы республиканың чазаанче киирген. Бо чылын программа езугаар сүт-бараан фермаларының тудуун эгелээр болгаш чаартыр, черлик өскен кат-чимисти чылда 260 тонна чедир болбаазырадыр комплекстиг дериг-херекселди тургузар база ону чыыр пунктуларны ажыдар. Ол ышкаш «Чедер» санатор-курорт комплекизиниң тудуун уламчылаар. Ооң объектилериниң туттунган шаа-биле ажыглалче киирер. Бо чылын комплекс 70 кижини дыштандырып болур. Ниитизи-биле көрдүнгени 250 кижи. Бо ажылдардан аңгыда «Тайга» даг-хаагы комплексти ажыглалче киирерин белеткеп турар. Көдүртүр херекселди саткан, трассазын арыглаан, автомашиналар турар шөлдерни белеткээн. Аңаа немей ам-даа түр хөлезилел черин, столоваяны тудар. Бирги чергениң объектилерин бо сезонда ажыдар. Улуг хемчээлдиг ажылдар чуртталга тудуг адырында көрдүнген. 2022 чылда 5 чуртталга-комплектиг тудуг төлевилелдери ажылын эгелээр. Ынаар 126 хөй квартиралыг бажыңнар,150 олуттуг 2 эмнелге төптери, 12 уруглар садтары болгаш школалар, 3 спортчу оран-сава, 2 культура-тоглаа төптери кирип турар. Ниитизи-биле 576,18 муң кв. метр чуртталга шөлү ажыглалга кирер. Аңаа 24 муң кижи квартираларны алыр. Тываның тускай хөгжүлдези программаның боттанылгазының үезинде 232 чаа ажылчын олуттар ажыттынар.   ТР-ниң Чазааның медээзинден Мира КОНГУЛ-ООЛ белеткээн.