Президентиниң Сибирь федералдыг округда бүрүн эргелиг төлээзи Анатолий Серышевтиң эрттиргени хуралда келир кышка Сибирь Федералдыг округ регионнарының белеткелин сайгарып чугаалашкан. Тываның Баштыңы Владислав Ховалыг Тывада чылыдылга-энергетика комплекизи ажылдаарынга белен, одалга сезону чогуур үезинде эгелээнин илеткээн.
– Анатолий Анатольевич чылыдылга-энергетика комплекизиниң база чуртталга-коммунал ажыл-агыйының шупту системаларының чогумчалыг ажылын хандырары чугула деп демдеглээн. Ук адырда тургустунган кандыг-даа айтырыгларны дыка дүрген чайладыр. Чурттакчы чонга кылып турар ажылдар дугайында болгаш планныг кандыг-даа өжүрүлделерни дүрген дыңнадыры чугула – деп, Владислав Ховалыг демдеглээн.
Бүрүн эргелиг төлээ-биле эрткен хуралда дыңнаткан сан-чурагайлардан алырга, Сибирь регионнарының коммунал объектилеринде кышка белеткел ажылдары 90-100 хуу доозулган. Тыва Республика – Алтай, Хакасия, Алтай край, Иркутск, Кемерово база Томск областар-биле кады, хөмүр-даштың чогуур курлавырын долу хемчээлде белеткээн регионнар санынче кирген.
Хурал үезинде чырык-четки комплекизиниң идегелдиг ажылын хандырарын аңгы сайгарган. Сибирьниң каттышкан энергосистемазында чырык энергиязынга хереглел өзүп турарын демдеглээн.
«Сибирьниң дошкун кыжының үезинде коммунал системаларның идегелдиг ажылдаары – хамаатыларның амыдырал-чуртталгазынга база чаагай чоруунга таарымчалыг байдалдарны тургузарынга чугула чылдагаан болур. Россия Федерациязының Президентизи Владимир Путин шак ындыг даалганы бистиң мурнувуста салган» – деп, Анатолий Серышев чугаалаан. Одалга үезин эки ажып эртер дээш, доктаамал база демниг ажылдаар апаар, деп бүрүн эргелиг төлээ түңнээн.
Одалга үезин эрттиреринге харыысалгалыг албан черлери – ТР-ниң Энергетика болгаш одалга яамызы, Чуртталга-коммунал ажыл-агый яамызы, курлавыр хандырылга организациялары, ол ышкаш муниципалдыг эрге-чагырга черлери чурттакчы чон-биле доктаамал харылзаага турар ужурлуг деп, Тываның Баштыңы демдеглээн.
