Тывада хөй ажы-төлдүг 2856 өг-бүле 2024 чылда одаар ыяшты болгаш хөмүр-дашты халас алыр. Хөмүр-дашты бо хевирниң ачы-дуза алыкчылары чурттап турар 114 чурттакчылыг черлерже октябрь 30-ге чедир чедирер.
«Социал хөмүр-даш» төлевилелиниң күүселдезин республиканың Күш-ажыл база Одаар чүүл болгаш энергетика яамылары харыылап турар. Төлевилелде киржип турар өг-бүле бүрүзүн регион бюджединиң акша-хөреңгизи-биле 2145 кг хөмүр-даш азы 4,8 куб метр одаар ыяш-биле хандырып турарын сагындыраал.
2023 чылда Тывада 2971 өг-бүлени хөмүр-даш болгаш одаар ыяш-биле хандырган. ТР-ниң Күш-ажыл яамызының демдеглээни-биле алырга, “социал” хөмүр-даш алыкчыларының саны чылдың-на өскерлип, сөөлгү үеде ол эвээжээн. Дыка хөй өг-бүлелер күрүне деткимчези-биле байдалын экижидип, төлептиг орулгалыг доктаамал ажылды тып ап турары-биле ол тайылбырлаттынар.
Чурукту социал четкилерден алган
