Тываның шииткекчилери Чөөн Сибирьниң эң-не бедик сынынга тугун аскан. Республикада эң-не бедик даг – Мөңгүн-Тайганың щыпшык бажынче (бедии — 3976 м) 41 кижи үнген. Оларның аразында Тываның суд системазының 9 кижиден тургустунган командазы бар: Тулуш Хээлиг Ирбен-оолович – ТР-ниң Дээди Судунуң кеземче херектериниң талазы-биле Суд коллегиязының даргазы, Монгуш Василий Байыр-оолович – ТР-ниң Дээди Судунуң шииткекчизи, Седен Андрей Бавууевич – Өвүр район судунуң даргазы, Монгуш Айдыс Сергеевич – Бии-Хем район судунуң даргазы база хүндүлүг дыштанылгада шииткекчилер Куулар Айлана Иргитовна, Серен-Чимит Кежик Кирович өөнүң ишти Орлана Олеговна, суд органының чолаачызы Салчак Аяс Чечен-оолович, ТР-ниң Дээди Судунуң парлалга ажылдакчызы Ширин-оол Аржаана Анатольевна.
Ук хемчегни Тыва Республиканың суд системазының 95 харлаанынга, Улуг Тиилелгениң 80 чылынга база Россия хүнүнге тураскааткан болгаш Мөңгүн-Тайганың шыпшыынче бир дугаар үнүп турар улуска сертификаттарны регионнуң Альпинизм федерациязы, «Убсунур ыйгылаажының» администрациязы тывыскан.
Мира Конгул-оол белеткээн.
Чуруктарны социал четкилерден алган.
