Тываның Дээди Суду республиканың өөредилге албан черлериниң сургуулдарының ортузунга профориентациялыг болгаш корум-чурум үрээшкиннеринге удур профилактиктиг ажылды чорударын уламчылап турар.

Чоокта чаа Дээди Судтуң ажыл-ижи-биле Тываның күрүне университединиң, эмчи колледжиниң сургуулдары, Тываның кадеттер корпузунуң база Чаа-Хөл кожууннуң Булуң-Терек суурунуң школачылары танышкан.

Ужуражылгалар мергежил шилип алырынга хамаарыштыр эртип турар. Шүүгү чериниң элээди аалчылары суд системазының структуразы-биле танышкан. Ол ышкаш аныяктар суд залдарын көрүп, суд системазының музейин сонуургааннар: кыдат болгаш моол империялар үезиниң кеземче системалары-биле таныжып, совет үе-биле деңнеп, амгы үениң хоойлужудулгазының кол билиглери-биле танышкан.

«ТывКУ-нуң юридиктиг факультединиң студентилери-биле ужуражылга элээн ханы эрткен. Оларга тодаргай лекцияларны кылгылаан. Ол ышкаш практика кырында суд хуралының ажыл-чорудулгазы-биле таныштырган. Ооң соонда шииткекчилер Тулуш А.М., Монгуш В.Б. база Сундуй М.С. студентилерниң айтырыгларынга харыылааннар» — деп, организакчылар демдеглээн.

Мира Конгул-оол белеткээн.
Чуруктарны социал четкилерден алган