Республиканың школаларында оолдар, уруглар Адалар хүнүн таварыштыр янзы-бүрү акцияларда, челленджтерде киржип турар. Олар ачалары-биле фоточуруктарын салып, ачаларын чуруп база оларның дугайында чылыг-чымчак сөстерни бижип турарлар.
«Сылдысчыгаш» солуннуң редакциязы ыраккы Каа-Хем суурнуң 2 дугаар школазының өөреникчизи Янжмаа Сулдумнуң бижиин таныштырып турар.

Янжмаа Сулдум, ыраккы Каа-Хем суурда 2 дугаар школаның 6-гы классчызы:

— Мээң ачам эң-не эки, чүге дизе ол меңээ үргүлчү дузалажыр, деткиир. Ол кажан-даа өг-бүлези-биле хостуг үезин эрттирер дээш кызар, кежээлерде бистиң-биле чугаалажыр. Мени харыысалгалыг болурунга өөредир, шынчы, буянныг кижи болурун чагыыр. Ооң чагыг-сөзү сорулгаларымны чедип алырынга дузалаар, бодумга бүзүрелди бээр. Ындыг кайгамчык, уруг-дарыынга ынак ачалыг болганымга өөрүүр мен.

Алена Нан-Хоо белеткээн
«Сылдысчыгаш» солундан